އައްނަބީލް މުހައްމަދު ވަހީދުއްދީނާއި ބަނޑޮސް-2
ރައީސް އިބްރާހިމް ނާސިރަށްފަހު ވެރިކަމަށް ވަޑައިގަތީ ރައީސް މައުމޫން އަބްދުލްގައްޔޫމެވެ. މައުމޫނުގެ ސަރުކާރުން ބަނޑޮސް ހިންގުމާ ހަވާލު ކުރެއްވީ އައްނަބީލް މުހައްމަދު ވަހީދުއްދީން (ޑީން) އާއެވެ. ވަހީދުއްދީނަށް ބަނޑޮސް އެންމެފުރަތަމަ ތައާރަފުވީ އެމަނިކުފާނުގެ އުމުރުފުޅުން އެންމެ 16 އަހަރުގައެވެ. އެއީ އެމެރިކާގެ 35 ވަނަ ރައީސް ޖޯން އެފް ކެނެޑީ އަވަހާރަކޮށްލެވުނު އަހަރެވެ. ޖޯން އެފް ކެނެޑީ އަވަހާރަކޮށްލެވުނީ 1963 ވަނަ އަހަރުގެ ނޮވެމްބަރު މަހުގެ 22 ވަނަ ދުވަހުއެވެ. އެއީ ސުމުއްވުލްއަމީރު އިބްރާހިމް ނާސިރުގެ ބޮޑުވަޒީރުކަމުގެ ދައުރެވެ. އޭރު ދިވެހިރާއްޖޭގެ ރަދުންނަކީ ސުލްތާން މުހައްމަދު ފަރީދެވެ. ބަނޑޮހުގައި އޭރު ނާސިރުގެ ޚާއްސަ ގެއެއް ހުރެއެވެ. ފެހިގެއެވެ. އޮފީސް ހުންނަނީ އެގޭގައެވެ. ބަނޑޮހަކީ މާލޭ ވަކަރުގޭ ކުދިން ނުވަތަ މަގުމަތީ ކުދިން އިސްލާހު ކުރުމަށް ތައްޔާރުކުރެވިފައިހުރި އިސްލާހިއްޔާވެސް ގާއިމު ކުރެވިފައިވާ ރަށެވެ. މަގުމަތީގައި ހާވިޔާވެގެން ވިޔާނުދާކޮށް އުޅޭ ކުދިން ގެންދަނީ ބަނޑޮހަށެވެ.
އިސްލާހު ކުރަން ގެންދެވުނު ކުއްޖެއްގެ ގޮތުގައި ވަހީދުއްދީނު 9 މަހާއި 28 ދުވަސް ބަނޑޮހުގައި ހޭދަކުރެއްވިއެވެ. އެމަނިކުފާނަށް މަނާކުރެވިފައިވާ ކަންކަމުގެ ތެރޭގައި ފަތާފައި ނެރުތޮށިގަނޑާއި ހަމައަށް ދިއުމާއި ބޭރުންދާ ދޯނިފަހަރަށް ގޮވުމާއި ހަނާއެޅުން ހިމެނެއެވެ. ރަށުތެރޭގައި އުޅުމަށް މަނާ އެހެންކަމެއް ނޯވެއެވެ. މިދެންނެވި މުއްދަތަށްފަހު ބަނޑޮހުން ބޭރުކޮށްލެވުނީއެވެ. ވަހީދުއްދީނާއެކު އެމަނިކުފާނުގެ ރައްޓެއްސަކުވެސް ބަނޑޮހުގައި ހުންނެވިއެވެ. ޑރ. އަބްދުއްސަމަދެވެ. ވަހީދުއްދީނާ ބަނޑޮސް އަލުން ހަވާލު ކުރެވުނީ ބަނޑޮހުން ބޭރުކޮށްލެވުނުތާ ސާދަ އަހަރު ފަހުންނެވެ. ރައީސް މައުމޫނުގެ ސަރުކާރުންނެވެ. ބަނޑޮހާއި ހަވާލުވެވަޑައިގަތުމަށްފަހު ވިޔަފާރި ޕާރޓްނަރަކު ހޯއްދަވައި ވިޔަފާރި ފުޅާކުރެއްވިއެވެ. ސިންގަޕޫރުގެ މަހުޖަނު އޮންބެންގ ސެންއެވެ.
އޮނަރަބްލް ޑީން ވިދާޅުވެއެެވެ. ބަނޑޮސް އައިލެންޑަކީ ދިވެހި ރައްޔިތުންގެ ތަނެކެވެ. ދިވެހި ރައްޔިތުންނަށް ބަނޑޮހުން އަބަދުވެސް ޚިދުމަތް ލިބެން ޖެހޭނެއެވެ. އެއީ ރައްޔިތުންގެ ތަރިކައެކެވެ. ރައްޔިތުންގެ މުދަލެކެވެ. އެމަނިކުފާނުގެ ތަނެއް ނޫނެވެ. އެމަނިކުފާނުގެ މަސްއޫލިއްޔަތަކީ ތަން ހިންގުމެވެ. އެމަނިކުފާނުގެ ވައުދަކީ ކުންފުންޏަށް ލިބޭ ކޮންމެ ތަރައްގީއަކާއި ކޮންމެ ކުރިއެރުމެއްގެ ހިއްސާދާރުންނަކީ ރަށުގެ މުއައްޒަފުން ކަމުގައި ހެއްދެވުމެވެ. އަބަދުވެސް އެކަން އޮންނާނީ އެގޮތުގައި ކަމަށް އެމަނިކުފާނު ވިދާޅުވެއެވެ. ބޭސްފަރުވާ ކަމުގައިވިޔަސް ލޯނު ދީގެން ކަމުގައިވިޔަސް އަދި މުސާރައިގެ ގޮތުން ކަމުގައިވިޔަސް މެއެވެ. ބަނޑޮހުގެ މުވައްޒަފުންގެ ތެރޭގައި ޑިމޮކްރަސީގެ އުސޫލު ތައާރަފު ކުރައްވައި އެކި ފިކުރުތަކަށް އިހުތިރާމް ކުރެއްވިއެވެ. ތަފާތު ސިޔާސީ ފިކުރުތަކުގެ މީހުން ބަލާނެ ޚާއްސަ ދެ ޓިވީއެއް ބެހެއްޓެވިއެވެ. ބަނޑޮހުގައި މީޑިޔާ ޓީމެއް ހައްދަވައި އެޓީމު ތަމްރީނު ކުރައްވައި ފެންވަރު ރަގަޅު ސާމާނު ހޯއްދަވައި ދެއްވިއެވެ.
ބަނޑޮހުގައި ތަމްރީނު މަރުކަޒެއް އިމާރާތް ކުރައްވައި މީހުން ތަމްރީނު ކުރެއްވިއެވެ. އިމާރާތުގެ ނަމަކީ އަތޮޅުވެއްސެވެ. އިންސްޓްޓިއުޓް އޮފް ގަވަރނެންސް އެންޑް ޑިވެލޮޕްމެންޓުގެ ނަމުގައެވެ. ރާއްޖޭގެ ރަށްރަށުގެ ކައުންސިލަރުންނާއި ކައުންސިލް އިދާރާތަކުގެ މުވައްޒަފުން ބަނޑޮހަށް ގެންނަވައި އެމީހުންނަށް ލޯކަލް ގަވަރނެންސްގެ މަސައްކަތް ހިންގަވާނެ ގޮތުގެ ތަމްރީނުވެސް ދެއްވިއެވެ. މާލީ ދާއިރާ އާއި މުއާމަލާތް ކުރުމުގެ ދާއިރާ އާއި ގާނޫނީ ދާއިރާއިންނެވެ. މީގެއިތުރުން ޔޫތު ލީޑަރޝިޕްގެ ނަމުގައިވެސް ޕްރޮގްރާމްތަކެއް ހިންގެވިއެވެ. ހަމައެފަދައިން ބަނޑޮހުގެ މުއައްޒަފުން ތަމްރީނު ކުރުމުގެ ގޮތުން އެކިކަހަލަ ކުރު ކޯސްތައްވެސް ހިންގަވައި ދެއްވައެވެ. ކިޔައިވައިދެއްވީ ރާއްޖެއާއި ރާއްޖެއިން ބޭރުގެ ތަޖުރިބާކާރު ބޭފުޅުންނެވެ.
އޮނަރަބްލް ވަހީދުއްދީނަކީ ރައީސުލްޖުމްހޫރިއްޔާގެ ނާއިބުކަމާއި އެޓޯލްސް މިނިސްޓަރުކަމާއި ޔޫތު މިނިސްޓަރުކަމާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)ގެ މެންބަރުކަން ކުރެއްވި ބޭފުޅެކެވެ. އެމަނިކުފާނަކީ ރައްޔިތުންގެ ލޯތްބާއި އިހްތިރާމް ލިބިވަޑައިގެންނެވި ބޭފުޅެކެވެ. ދިވެހިރާއްޖެއަށް ކުރިމަތިވި ނޮވެމްބަރ ތިނެއްގެ އުދުވާނީ ހަމަލައިން ދިވެހިރާއްޖެ ސަލާމަތް ކުރެއްވުމަށްޓަކައި އޮނަރަބްލް ވަހީދުއްދީން އަމިއްލަފުޅަށް އިސްނަންގަވައިގެން ގިނަގުނަ މަސައްކަތްތަކެއް ކުރެއްވިއެވެ. އެންމެފުރަތަމަ ދިވެހި ރާއްޖޭގައި ހުޅުވުނު ކޮންވެންޝަން ސެންޓަރާއި ޑީކޮމްޕްރެޝަން ޗެމްބަރު ހުޅުވުނީވެސް ބަނޑޮހުގައެވެ. ރިސޯރޓެއްގައި އެންމެ ފުރަތަމަ ޕްރޮވިޑެންޓް ފަންޑް ހުޅުވީވެސް ބަނޑޮހުގައެވެ.
ބަނޑޮހަކީ ގައުމަށް ޚިދުމަތްކުރި އެތަކެއް ޚިދުމަތްތެރިން ތަމްރީނު ކުރެވުނު ރަށެކެވެ. ގައުމަށް ޚިދުމަތްކުރި އެތަކެއް ޚިދުމަތްތެރީން އުޅުނު ރަށެކެވެ. ބަނޑޮހަކީ ސަރުކާރުގެ އެކިކަހަލަ ޖަލްސާތަކާއި ސަރުކާރުގެ އެތައް ރިޓްރީޓްތަކެއް ބާއްވަމުން ގެންދާ ރަށެކެވެ. އޮނަރަބްލް ވަހީދުއްދީން މިފަދަ ކަންތައް ކުރައްވަނީ ގައުމީ ޚިދުމަތެއްގެ ގޮތުގައެވެ. ގައުމީ ރޫހުގައެވެ. ދިވެހި ރައްޔިތުންނަށް ޓަކައެވެ. މިއީ އެމަނިކުފާނު ތަކުރާރުކޮށް ވިދާޅުވަމުން ގެންދަވާ ވާހަކަފުޅެކެވެ. މިދެންނެވި ކަންކަމުން އެމަނިކުފާނު ވަނީ ދިވެހި ރައްޔިތުންގެ ވަރަށް ގިނަ ބައެއްގެ ލޯތްބާއި އިހްތިރާމް ހޯއްދަވައިފައެވެ.
ފަހުގެ ޚިޔާލުތައް